‘Mighty 8’ ng oposisyon paliliparin ng 2 ‘Darna’ sa ‘22 elections

‘Mighty 8’ ng oposisyon paliliparin ng 2 ‘Darna’ sa ‘22 elections

Ni Junex Doronio

MANILA — Labingpitong buwan pa bago sumapit ang 2022 national at local elections pero nakadampot na ang grupong oposisyon ng dalawang matinding pambato na kasama sa tinagurian nitong “Mighty 8.”

Kabilang dito ay dalawang “Darna” at prominenteng personalidad sa politika at syobis na sina Angel Locsin at Vilma Santos-Recto sa larangan ng pagka-Senador sa  2022.

Parehong gumanap bilang local super heroine na “Darna” sina Locsin at Santos-Recto sa  pelikula at serye sa telebisyon.

Sa kanilang  Facebook post, ang Philippine Political Organizations Links, Inc. (PhilPOLinks) sa bisa ng kanilang electoral arm na ARMAS (Alyansa para sa Repormang Makabansa at Alternatibong Serbisyo ng Bayan) nitong Linggo, na pinangalana din sa “Mighty 8” senatorial bets nito sina television personalities Karen Davila at Pinky Webb.

Si Vilma Santos-Recto na tinagurian ding “Star for All Seasons,” ay kasalukuyang Deputy House Speaker Vilma Santos-Recto ng Kongreso.

Kabilang din sa “Mighty 8” sina dating Vice President at ngayo’y  Makati Rep. Jejomar “Jojo” Binay, dating senadores na sina JV Ejercito at Bam Aquino, at Tuburan, Cebu Vice Mayor Aljun Diamante, na siya ring Executive Vice President ng Vice Mayors League of the Philippines (VMLP).

Nauna rito, sinuyo ng PhilPOLinks at ARMAS ang dating military rebel leader at ngayo’y Metro Manila Development Authority (MMDA) chairman Danny Lim para tumakbo  sa pagka-bise presidente.

Wala pa silang   napipisil na presidential bet.

“The objective is to concentrate muna for VP. Maybe along the way negotiations will be undertaken to coalesce with a viable presidentiable but with the same political beliefs and principle,” pahayag ni PhilPOLinks president Rudy “Kid” Cañeda nang tanungin kung sino ang posibleng magiging presidential running-mate ni Lim.

Inilarawan ni Cañeda si Lim na isang  “true soldier, an officer and a gentleman, and an advocate of human rights.”

Sa kanilang senatorial slate para sa 2022, sinabi ni Cañeda na walo ang kanilang senatorial bets na kilala sa kanilang  integridad, independence at sinseridad na makapagsilbi sa bayan.

“Sa Senado dapat pulido, sila ang ating mga idolo,” pakli ni Cañeda. (AI/MTVN/EM)

Leave a Reply