Kaalaman sa laman

Kaalaman sa laman

APUNTALE o te vas a olvidar. Ilapat sa sulat upang hindi mo malimot.

Arabiko ang ugat ng katagang ‘sulat’. Dasal, dalangin, katha, oracion ang katumbas sa ating wika. At tahasang dasalsal– o paulit-ulit na dasal– ang nakagawian ng katawan sa araw-araw na ginawa ng Maykapal.

Nang makapag-asawa ng maykaya ang dating kasama sa isang boarding house sa UP Diliman, kinalawang na daw ang kanyang mga daliri. Hindi na makatugtog ng gitara. Hindi na muling hahaplos, kukurot, aantig sa mga bagting upang dumaloy ang mga himig ng ‘Hatinggabi’ ni Antonio Molina, o ‘Tres Notas Para Decir Te Quiero’ ni Vicente Amigo. Natunton ko ang damuho sa Cagayan de Oro; maginhawa na ang pamumuhay, may-ari ng maraming paupahang apartment ang kanyang napangasawa. Nakalublob na sa kumunoy ng ginhawa.

‘Hindi Kita Malimot’ ni Josefino Cenizal ang dumadaloy na kundiman sa laman tuwing nagsasanay ako ng sanchin kata ng gojukai. Katumbas na araw-araw na dasal tuwing umaga.

Tatlong sagupaan ang katuturan ng sanchin kata, na ayon sa mga sinaunang dalubguro ng karatedo, ay taimtim na pagsasanib ng katawan, damdamin, at diwa. Matulaing pakinggan pero yakap ang pakay nito sa ‘bawat kaldag, tiyak na kamatayan.’

Hindi po ako marahas o palaaway– ‘yun po kasi ang nakagisnan ng katawan sapul kamusmusan. At mga kislot, kilos, igkas, bigkas, bigwas, galaw, at gaslaw niyon ang walang humpay na isinangkap sa mga himaymay ng kalamnan. Walang katapusang paghubog at pagpanday sa pagdaloy ng panahon upang mapag-isa ang katawan, damdamin, at diwa. Sabi nga, neither dust nor rust settles on a blade constantly honed.

Kawangki lang ng pagsasalin ng kaalaman sa laman. Lots and lots and lost of muscle memory to deter body lethargy– because that’s the letter after F, fail.

Pero, mayroon din pong hindi kanais-nais na side effect. O sa mas angkop na katagurian, front effect. Sa edad kong ito, lalo yata akong nakakaramdam ng paninigas ng kuwan.. Lalo kapag napapahimod ang paningin sa kaakit-akit na tabas ng katawan ng sinumang dilag. Sintomas po yata ng sakit na apodyopsis– ” the act of mentally undressing someone, imagining someone naked.”

Kaya lang, bihira na pong mangyari ang gano’n. I’ve sated my sights in the past to seeing bodies voluptuous– and these days, a lot of the bodies I see remind me of “The Complete Works of Oscar Wilde.” Voluminous. (AI/MTVN)

Leave a Reply