REPORMA sa mga LICENSURE EXAMS KAILANGAN!

REPORMA sa mga LICENSURE EXAMS KAILANGAN!

DOLE Sec. Silvestre Bello na syang nagpanukalang alisin na ang bar, licensure board exams

Sagot sa mga tanong, hindi dapat parang exam ng grammar sa wikang ingles.

Maraming hindi sang-ayon sa panukala ni Sec. Silvestre Bello III na tanggalin na ang mga licensure exams gaya ng Bar at Board exams.

Bar passer po si Atty. Bello kaya alam niya ang hirap hindi lang sa pag-aaral kundi pangangailangang pinansyal din para sa magulang para makapag handa at mag-take ng exam.

Pero kung hindi man ito buwagin ay kailangan ng reporma. At ang isang repormang dapat ay ang paggamit ng wikang Pilipino sa mga tanong at sagot.

Sa totoo lang marami ang bumabagsak hindi dahil sa hindi nila alam ang sagot sa tanong kundi “wrong grammar” kasi sila. Ano ba ang licensing exam? Pagalingan ba mag ingles o pagsusulit para malaman kung handa sila sa propesyong kanilang pinag-aralan ng mahabang panahon?

May mga Bar examiners ang nagsabi na mali-mali ang english grammar ng mga sagot ng examinees. Pero mali kaya ang sagot nila kung papayagan natin na sagutin nila ang mga tanong sa wika o dialect na mas sanay sila? Marahil panahon na, na ang mga tanong sa mga licensing exam ay hindi lang sa ingles kundi sa wikang Pilipino ibigay at payagang sagutin din ng wikang Pilipino para naman hindi magmukhang english exam ang mga licensure exams.

“English is a language not a measure of intelligence”. Sa ibang bansa kung ano ang wika nila yun ang gamit sa husgado ng mga abogado. Sa atin kailangan pang i-interpret sa ingles ang sagot ng testigo samantalang lahat naman ng nandung abogado, judge ay naiintindihan naman ang sinasabi ng testigo.

Tuloy nagtatalo-talo pa ang mga abogado kung tama ang translation ng translator!

May mga hukom na Pilipino gamit sa kanilang “Kapasyahan”. Sa Korte Suprema sa kasong People vs Ventura Vinuya y Dela Cruz (G.R. 125925) ay isinulat ni dating Justice Antonio Martinez ang “Kapasyahan” ng hukuman sa Pilipino.

Marahil kung may dapat tayong baguhin sa mga licensure exam ay ang hindi gawin english tests ang mga ito. At kung sakaling halo sa wikang Filipino at english ang sagot pero tama naman di ba at mas dapat pumasa sya kaysa sa sagot na maganda mag ingles pero mali naman.

Mas importante na naiintindihan natin ang batas kaysa hindi natin naiintindihan dahil nakasaad sa wikang banyaga.

Hindi natin sinasabi na dapat hindi tayo matuto ng ingles. Tama naman matuto tayo ng mga wikang banyaga pero mas bigyan natin ng prayoridad ang paggamit ng sarili natin wika. Mas maiintindihan natin ang batas. Mas malalaman natin ang ating mga karapatan.

Huwag natin buwagin ang mga pagsusulit pero hayaan natin gamitin ng mga examinees ang wikang nais nila gamitin sa pagsagot sa mga katanungan. At marahil ay mas tataas ang antas ng ating mga propesyon. (ai/mtvn)

Leave a Reply